Қазақстандық оқушылар ЖИ олимпиадасында 8 медаль жеңіп алды

Астанадағы жасанды интеллект бойынша 3-халықаралық олимпиада Қазақстан құрамасы үшін тарихи жетістікпен аяқталды. Ұлттық құрама сапындағы сегіз оқушының барлығы жүлдегер атанып, қоржынға 2 алтын, 2 күміс және 4 қола медаль салды. Нәтижесінде еліміз бейресми командалық есепте 6-орынға жайғасты. Отандастарымыздың арасынан Дәужан Бекетов жетістігі айрықша. Ол жеке сайыста алтын медаль еншілеп, абсолюттік есепте әлемнің үздік үш қатысушысының қатарына еніп, 2-орын иеленді. Осылайша, Дәужан Бекетов AOAI тарихында абсолюттік есепте жүлде алған алғашқы қазақстандық атанды. Жарыс 2-8 тамыз аралығында елордада өтті. Жабылу салтанатында AOAI-дың ресми туы Сингапур делегациясына табысталды.