Жаңалықтарды Telegram арнамыздан оқыңыз!Жетісу облысында шетелден әкелінген автокөліктерді заңдастыру жалғасуда. Жыл басынан бері eGov порталы арқылы 3200-ге жуық тұрғын өтініш берсе, олардың екі мыңнан астамына оң шешім қабылданған. Көліктердің басым бөлігі Армения, Ресей, Қырғыз елдерінен тасымалданған.
Сондай-ақ, Моңғолия, Қытай, Біріккен Араб Әмірліктері және АҚШ-тан да темір тұлпар жеткізгендер бар. Шетелдік көліктерді тіркеу барысында жалған ақпарат беріп, заңды айналып өтпек болған 8 жағдай тіркелді. 4 дерек бойынша қылмыстық іс қозғалған.
Естеріңізге сала кетейік, еліміз бойынша бір реттік көлік заңдастыру шарасы 31 желтоқсанда аяқталады.
Жасұлан Байкенов, Жетісу облыстық Полиция департаменті бастығының бірінші орынбасары:
Агрегаттық номерлерін тексеру барысында техпаспортпен сәйкес келмейді, тағы да басқа кузовтары ауыстырылған автокөліктер шықты. Сондай деректер анықталғаннан кейін біз анықтау бөліміне беріп, ол жерде қылмыстық кодекстің 385-бабына сай тергеу жүргізіп жатыр.
Қуаныш Серікқанов
