«Әдебиет порталының» ашылғанына 2 жыл толды

Интернеттің қазақ тіліндегі сегментін дамыту, ұлт әдебиетінің электронды кеңістікте оқырмандарға қолжетімділігін қамтамасыз ету мақсатында жұмысын бастаған «Әдебиет порталының» ашылғанына бүгін 2 жыл толды.

«Қазконтент» АҚ-ның бірегей жобасы саналатын «Әдебиет порталы» бүгінде қазақ әдебетінің көрнекті өкілдерінің өмірбаяндарын, шығармаларын жинақтаған интернеттегі санаулы ресурстардың бірі. Порталда халық ауыз әдебиетінен бастап, жыраулардың, сал-серілер мен ақындардың, халық жазушыларының, шетел әдебиетінің көрнекті өкілдерінің туныдылары топтастырылған. Сонымен қатар, портал замануи әдеби үрдісті де қадағалап, жас жазушылар мен ақындарды таныстырып келеді.

Порталға күні бүгінге дейін төрт тілде 3 336 электронды кітап жүктеліп, 3 180 автордың жеке парақшасы ашылған, 200-ге тарта кітаптың қысқаша мазмұны, 600-ден астам әдебиет тақырыбындағы аудио-видео өнімдер орналастырылған және 1 495 блогер порталға өз шығармаларын өздері қойып, оқырманмен кеңінен бөлісуге мүмкіндік алды. Сонымен қатар, портал әдебиет әлемінде күнделікті болып жатқан жаңалықтарды үздіксіз жариялап, ақын-жазушылармен тұрақты сұхбат жүргізіп, олардың сиясы кеппеген шығармаларын дер кезінде оқырманға ұсынып отыр. Порталға айына 150-200 мың оқырман кіреді.