Қостанай облысында 3,5 млн-нан астам көшет отырғызылды

Өткен жылы күзде Қостанай облысы Әулиекөл ауданында болған өрт зардабын жою жұмыстары әлі жалғасып жатыр. Мұндағы орман шаруашылықтарындағы 735 гектар жерге қазірдің өзінде 3 жарым миллионнан астам көшет отырғызылған. Бұған қоса тазарту жұмыстары да жүргізілуде. Бірінші жартыжылдықта 307 мың текше метр ағаш кесу жоспарланған. Ереже бойынша оларды сатудан түскен 448 млн теңге орманды қорғау мен сақтау үшін қажетті техникаларды сатып алуға жұмсалады. Мамандардың айтуынша, жанған орманды тазартып, экожүйені қалыпқа келтіру үшін 5-6 жыл қажет. Еске сала кетейік, аймақтағы орман өрті шамамен 40 мың гектар аумақты шарпып, 22 млрд теңге шығын келтірілген болатын.  

Дарын Сағитов