Үкіметте көктемгі тасқынға қарсы шаралар пысықталды

Шардара мен Көксарай су қоймаларындағы жағдай күрделі. Төтенше жағдайлар министрінің айтуынша, олардың толуы 98 процентке жеткен. Мұның қандай қауіпі бар? Жалпы Үкіметтің көктемгі тасқынға дайындығы қалай?

Досжан Маратұлы, тілші

Бүгін Үкіметте көктемгі тасқынға қарсы шаралар қаралды. Төтенше жағдайлар министрінің айтуынша, биыл қар көп. Сондықтан 250-ден астам елді мекенді қызыл су басу қаупі бар. Синоптиктердің болжамы да көңіл көншітпейді. Наурыз жауын-шашынды болады, әрі күн күрт жылымақ. Сондықтан министр әкімдерді тасқынға дер кезінде дайындалуға шақырды.

Юрий Ильин, ҚР Төтенше жағдайлар министрі:

Өңірлердегі аудандарда шағын елді мекендерде тасқынға қарсы дайындық төмен. Төтенше жағдайлай қызметкерлері әкімдіктерге 179 ескерту парағын берді. Әсіресе Павлодар, Түркістан, Ақмола және Батыс Қазақстан облыстарында тасқынға қарсы шараларды қолға алу қажет.

Бұдан бөлек, Шардара және Көксарай су қоймаларындағы жағдай қауіпті, дейді Ильин. Өйткені олардың толуы қазірдің өзінде 98 процентке жеткен. Ал артық суды көп мөлшерде ағызу Түркістан және Қызылорда облыстарындағы елді мекендерге қауіп төндіреді. Сондықтан Премьер суды аз аздан ағызып, қоймаларды босату қажеттігін айтты.

Досжан Маратұлы