Елімізде жол апатынан 700 адам қаза тапты

Жыл басынан бері елімізде жол апатынан 700-ден астам адам қаза тауып, 7 мыңға жуығы түрлі дене жарақатын алған. Бұл туралы Ішкі істер министрлігі мәлімдеп, көпшілікке үндеу жасады. Тәулік сайын елімізде жол апатынан 10-нан аса адам қаза тауып, 70-ке жуығы түрлі жарақат алады екен. Зардап шегушілердің басым бөлігі балалар мен 40 жасқа дейінгі азаматтар. Жол көлік оқиғасының басты себептері-жылдамдықты арттыру, қарсы жолаққа шығып кету және жүргіншілер жолын байқамау, дейді құзырлы министрлік. Азаматтарға жол ережесін қатаң сақтауды ескертеді.

Атығай Арыстанов, ҚР ІІМ Әкімшілік полиция комитетінің төрағасы:

Мәселен, тыйым салынған жерден жүгіріп өтудің өзі сізге оңай болып көрінгенімен, оның зардабы қайғылы. Жылдамдық режимін сақтамау – отбасы үшін қатерлі. Сондықтан жылдамдық режимін, автокөліктер арасындағы қауіпсіз қашықтықты сақтау өте маңызды. Бұл апаттың алдын алуға көмектеседі.