Ақтөбе облысында жолда қалған 57 жолаушы құтқарылды

Ақтөбе облысында боранда жолда қалған 57 адам құтқарылды. Олардың барлығы Темір ауданының аумағында тұрып қалған. 

Кеше ауа райының күрт нашарлауына байланысты Қандыағаш қаласынан Атырау облысының шекарасына дейінгі жол бөлігінде жүк және жолаушылар көлігінің жүруіне уақытша тыйым салынған еді. Астана-Атырау және Ақтөбе -Сағыз бағытындағы екі автобустың ішінде алпысқа жуық адам болған.

Төтенше жағдайлар департаментінің қызметкерлері оларды Шұбарқұдық кентіндегі жылыту пунктіне жеткізді. Жолаушылар медициналық көмекті қажет етпеді.