Батыс Қазақстан облысында 140 үй мен 2 әлеуметтік нысан суға кетті

Су тасқынына байланысты облыстың 4 ауданында төтенше жағдай жарияланды. Қаратөбе, Шыңғырлау, Бөрлі мен Жәнібекте барлығы 140 үй мен екі әлеуметтік нысан суға кетті.

Аймақта 750 адам қауіпсіз жерге көшірілді. Оның 200-ден астамы – бала. Мал шығыны да бар. Ресми мәлімет бойынша, 108 түлік арам өлген. Қазір Жәнібек ауданы Жақсыбай ауылында су деңгейі түсті. Ауылда 282 үй болса, соның 97-сі суға кеткен. Ал Қаратөбе ауданы Шалғын ауылында көшірілгендер саны 96-ға жетті. 29 үй суға кетті. «Жәнібекке су Ресейден келді, жоғары жақ бөгетті ашып жіберді» деген ақпарат жалған деп мәлімдеді құзырлы орган.

Ернұр Өтегенов, облыстық Төтенше жағдайлар жөніндегі департамент басшысы:
Жақсыбай ауылы Ресейге жақын орналасқан. Бұл – сол шекаралардан қардың тез еруінен пайда болған су. Ол ауылдан өтіп,  су қоймасына барып құйылады.