Жаңалықтарды Telegram арнамыздан оқыңыз!Ақмола облысында 25 елді мекенді су басуы мүмкін. Аршалы мен Атбасар аудандарында жағдай қиын. Атбасар ауданында 502 үй қауіпті аймақта тұр. Оның 260-ы қаланың өзінде. Бұл жақта қар қалың түскен. Ал Аршалы ауданының Жібек жолы кентіне Астана су қоймасы жақын болғандықтан қауіп күшті болып тұр. Сондықтан мамандар осы бастан ағын судың алдын алуда. Қоймалардан су жіберу кестелері жасалып, елдімекендерден қар үздіксіз шығарылып жатыр. Сондай-ақ, облыстағы өзендерде мұз жару жұмыстары да басталды. Болжам бойынша наурыз айында әлі де жауын-шашын болады.
Нұрлан Атығаев, облыстық Төтенше жағдайлар департаментінің бастығы:
Егер Астана су қоймасынан көп көлемде су жіберілсе, Аршалы ауданы Жібек жолы кентінің 4, 8-шағын аудандарын су басып қалуы мүмкін. Қаупі жоғары. Сондықтан аудандық әкімдіктен 15 миллион теңге бөлініп дамба қатайтылды. Биіктігі де жоғарылады. Жағдай күнделікті бақылауда болады.
Ермек Елберген
