Батыс Қазақстанда бензинді қымбатқа сатпақ болған кәсіпорынға айыппұл салынуы мүмкін

Батыс Қазақстанда бензинді қымбатқа сатпақ болған кәсіпорынға 3 млн теңгеге дейін айыппұл салынуы мүмкін. Бұл заңбұзушылықты бір ай бұрын мемлекеттік сатып алу туралы порталынан «Әділдік жолы» қоғамдық бірлестігінің мамандары тауып, анықтаған еді. «МегаОйлОрал» серіктестігі облыстық Полиция департаментіне, өзге де бюджеттік ұйымдарға бензиннің әр литрін 210 теңгеге сатып алу туралы бірнеше келісімшартқа қол қойған. Ал биыл Энергетика министрінің бұйрығымен облыста Аи-92 маркалы бензинінің шекті бағасы 182 теңге деп бекітілген еді. Кәсіпорын 415 мыңнан астам теңге қаржыны бюджетке қайтарды. Оған қатысты әкімшілік іс қозғалып, сотқа жолданды.

Ардақ Мұратқызы