АҚШ Украинаға танкіге қарсы зымыран сатады

АҚШ-тың Мемлекеттік департаменті Украинаға «Джэвлин» танкіге қарсы зымырандық кешенінің 150 данасын сатуға келісті. Олардың жалпы құны 39 миллион 200 мың долларға бағаланып отыр. Бұл туралы мәлімдемені Пентагон таратты.

Қаржыны Құрама Штаттар емес, Украина үкіметі бөледі. Екі мемлекеттің лидерлері дәл осы ракета мәселесін шілденің 25-дегі телефон әңгімесінде қозғаған.

Сол тілдесуде Дональд Трамп Владимир Зеленскийге Американың бұрынғы вице-президенті Джо Байденді тергеуге келіспесең, Украинаға қару сатпаймыз десе керек. Осы қысымнан кейін демократтар президентті отставкаға жіберу мақсатында оған қарсы импичмент процесін бастап отыр.

Арыстан РЫСБЕК