Ресей мен Сауд Арабиясы ОПЕК елдерін мұнай өндірісін қысқарту келісімін орындауға шақырды

Сауд Арабиясы мен Ресей ОПЕК елдері мен олардың одақтастарын мұнай өндірісін қысқару келісімін жақсырақ орындауға шақырды. Сондағы мақсат – энергетикалық шикізатты азырақ шығарып, оның әлемдік нарқын көтеру.

Қазір Нигерия мен Ирак «қара алтынды» шектен тыс өндіріп, бағаны түсіреді деген қауіп туындап отыр. Бұған қоса, АҚШ-Қытай сауда соғысы ғалам экономикасының өсімін тежеп, мұнайға сұранысты азайтуы мүмкін.

Сәрсенбі күні бұл шикізат бағасы екі пайызға төмендеді. Бұған Құрама Штаттар президенті Дональд Трамптың Иранға қарсы санцияларды жеңілдету жолдарын қарастырып жатқаны туралы хабар себепші. Ол мәлімет расталса да Тегеранның экспорты күшейіп, баға тіпті құлдырайды деген қауіп бар.

Арыстан РЫСБЕК