Асқар Мамин Халықаралық валюта қорының сарапшыларымен кездесті

10 айдың қорытындысы бойынша жалпы ішкі өнім 3,5 пайызға дейін өсіп, пандемияға дейінгі көрсеткішке жетті. Бұл туралы Премьер-Министр Асқар Мамин Халықаралық валюта қорының сарапшыларымен кездесуінде айтты. Әрі елдегі экономикалық ахуал, сондай-ақ пандемия салдарын төмендету және халық пен бизнесті қолдау бойынша сараптамалық бағалаулар таныстырылды. Болжамға сәйкес ел экономикасының өсу қарқыны 3,7%-ға жеткен. Халықаралық валюта қорының өкілдері Қазақстандағы қаржылық қадағалауды күшейту, инфляциялық таргеттеу, салықтық және бюджеттік әкімшілендіруді цифрландыру жөніндегі шараларға жоғары баға берді.

Премьер-Министр пандемиядан кейін жағдайды қалыпқа келтіру үшін Мемлекет жоспарлаудың жаңа жүйесіне көшкенін атап өтті. Тараптар ақша-несие, валюта, салық-бюджет саясаты, банк саласындағы ахуал, жеке секторды дамыту және Қазақстанда жүргізіліп жатқан экономиканың құрылымдық реформалары мәселелерін талқылады.

Раушан Сайлауқызы