Алексей Навальный 30 тәулікке қамалды

Ресейлік оппозиционер Алексей Навальныйға «жаппай қарсылық акциясын ұйымдастыру тәртібін қайта бұзды», «полицияға бағынбады» деген айып тағылды. Ол 30 тәулікке қамалды. Полиция оппозициялық саясаткерді үйінің кіреберісінде ұстаған. Навальныйдің үндеуімен дүйсенбіде өткен коррупцияға қарсы шерулерде Мәскеу мен Санкт-Петербургтің өзінде 1000-нан астам адам қамауға алынды. Ресей астанасындағы наразылық акциясына 4,5 мыңдай адам қатысқан. Билік шерудің Сахаров алаңында өтуіне рұқсат еткен-ді. Алайда, ұйымдастырушылар  адамдарды Тверской алаңына баруға үндеген. АҚШ демонстранттардың тұтқындалуын сынға алып, Ресей билігін оларды босатуға шақырды.

Арай ТӨЛЕГЕНҚЫЗЫ