Пәкістанда содырлар сот ғимаратына шабуыл жасады

Пәкістанның Чарсадда округіндегі сот ғимаратына жасалған шабуылды тәліптерге қарасты «Джамаат уль-Ахрар» тобы өз мойнына алды. Радикалдық ұйым журналистерге мұндай ақпаратты осыдан бірер сағат бұрын берген.

Соңғы мәліметке қарағанда, сот үйінің кіреберісінде жанкешті-лаңкес қол гранатасын жарып жіберіп, оның сыбайластары оқ жаудырған. Одан кемінде 4 адам қаза тапты. Алайда, куәгерлердің сөзінше, құрбандардың саны бұдан да көп.

Кейбір мәліметтерге сай, қарулы топтың бір мүшесі өлтіріліп, біреуі сот ғимаратында жасырынып жүр. «Рейтердің» хабарлауынша, атыс әлі жалғасып жатыр.