Алаяқтар «Қазпоштаның» атын пайдалана бастады

Алаяқтар қазақстандықтардың жеке деректерін ұрлау үшін «Қазпоштаның» атын пайдалана бастады. Бас прокуратураның мәліметінше, 9 қарашадан бастап азаматтарға қазақ тілінде жалған хабарламалар таратыла бастаған. Онда сәлемдемені жеткізу үшін мекенжайды нақтылау қажеттігі айтылып, сілтеме арқылы өту ұсынылады. Алайда бұл – жеке мәліметтерді, соның ішінде тұрғылықты мекенжайды ұрлауға арналған фишингтік сайт. Осыған байланысты прокуратура күмәнді сілтемелерге өтпеуге, жеке және банк деректерін енгізбеуге шақырады. Сәлемдеме туралы ақпаратты тек «Қазпоштаның» ресми арналары арқылы тексеру қажет.