Қазақстан мен Түркия Президенттері шағын құрамда келіссөз жүргізді

Түркия Республикасына ресми сапармен барған Қасым-Жомарт Тоқаевты, Анкарадағы Президент сарайында салтанатты қарсы алу рәсімі өтті. Мемлекет басшысының келуіне орай Құрмет қарауылы сап түзеді. Сарайға келген сәтте Президент кортежін салт атты гвардия бастап жүрді. Қасым-Жомарт Тоқаевты Режеп Тайип Ердоған қарсы алды. Қазақстан мен Түркияның мемлекеттік әнұрандары орындалып, зеңбіректен 21 дүркін оқ атылды. Мұнан соң, Президенттер бір-біріне ресми делегация мүшелерін таныстырды. Содан кейін мемлекеттер басшылары шағын құрамда келіссөз жүргізді. Президенттердің келіссөзі екі елдің ресми делегация мүшелерінің қатысуымен одан әрі жалғасты. Қасым-Жомарт Тоқаев бауырлас елдің Республика күні қарсаңындағы жүздесу терең символдық мәнге ие екенін айтып, Түркия Президенті мен барша түрік халқын ұлық мерекемен құттықтады. Келіссөз барысында екі ел басшылары көлік-логистика, энергетика, жасанды интеллект, ауыл шаруашылығы, қорғаныс өнеркәсібі және мәдени-гуманитарлық бағыттағы ықпалдастық мәселелерін талқылады. Тараптар мамыр айында Астанада қол қойылған Мәңгілік достық және кеңейтілген стратегиялық серіктестік туралы декларацияның маңыздылығын атап өтіп, екіжақты байланыстарды нақты қадамдармен тереңдетуге ниетті екенін жеткізді.