Балаларды қорғау жүйесі жетілдіріледі

Елімізде балаларды қорғау жүйесі жетілдірілмек. Президенттің бастамасымен бала құқықтарын қорғауға, зорлық-зомбылықтың алдын алуға және қауіпсіздігін қамтамасыз етуге бағытталған заңнамалық және институционалдық реформалар жүзеге асырылып жатыр. Бұл туралы Оқу ағарту министрі мен БҰҰ Бас хатшысының балаларға қатысты зорлық-зомбылық мәселелері жөніндегі арнайы өкілімен өткен жиында талқыланды. Шарада алдағы 4 жылға арналған «Қазақстан балалары» тұжырымдамасының басты бағыттары таныстырылды. Сондай-ақ өңірлік бала құқықтарын қорғау басқармаларын құру, зорлық-зомбылық пен буллингтің алдын алу, білім беру ұйымдарындағы психологиялық қауіпсіздікті нығайту және балалардың, оның ішінде «111» байланыс орталығы арқылы көмекке жүгіну мүмкіндіктерін кеңейту шаралары қарастырылды.