Елде инвестиция тарту жүйесі жетілдіріледі

Қазақстан инвестиция тарту тетіктерін жаңартады. Премьер-министр Олжас Бектеновтің төрағалығымен өткен кеңесте инвесторлармен жұмысты жеделдету және жобаларды сүйемелдеуді күшейту мәселелері қаралды. Енді бастамаларға тек қаржы тарту емес, оның толық жүзеге асуына басымдық берілмек. Алғашқы келіссөздерден бастап нысанды іске қосу, өндірісті кеңейту және қайта инвестициялауға дейінгі кезеңдер назарда болады. Үкімет рұқсат алу рәсімдерін қысқартып, жобаларды іске қосу мерзімін жеделдетуді көздеп отыр. Инвесторлар мен мемлекеттік органдар арасындағы байланысты жеңілдету үшін цифрлық шешімдер енгізіледі. Кеңес соңында Ұлттық экономика министрлігіне осы бағыттағы нақты іс-қимыл жоспарын әзірлеу тапсырылды.