Республикалық бюджет кірісі ₸20 трлн-ға жуықтайды

Республикалық бюджет кірісі келер жылы 19,9 трлн теңге болады. Бұл туралы Ұлттық экономика вице-министрі Азамат Әмрин Құрылтайдың комитет отырысында 2027-2029 жылдарға арналған бюджет параметрлерін таныстыру кезінде мәлімдеді. Вице-министрдің айтуынша, бұл биылғы болжаммен салыстырғанда 2,8 трлн теңгеге көп. Экономиканың өсуінің арқасынада қазынаға қосымша 1,6 трлн теңге түспек. Сондай-ақ қосылған құн салығын қайтару көлемінің азаюы тағы 1,1 трлн теңге кіріс әкеледі. Ал басқа факторлардан 500 млрд теңге түсім болжанған. Жалпы келесі жылы бюджет қаржысы жалпы ішкі өнімнің 10 пайызына тең болуы ықтимал. Ал инфляция 7,5–9,5 пайыз деңгейінде болады деген болжам бар.