Дропперлікке қатысты 11 іс сотқа жолданды

Атырау облысында дропперлік бойынша 45 дерек тіркеліп, 11 іс сотқа жолданды. Жалпы жыл басынан бері өңірде интернет-алаяқтыққа қатысты 120 қылмыстық іс соттың қарауына жіберілген. Алаяқтар жалған интернет-дүкендерде тауар сату, алдау немесе фишингтік сілтемелер жіберіп, тұрғындардың жеке деректерін ұрлау арқылы арам ойын жүзеге асырған. Қазір интернет-алаяқтықтың алдын алу, сондай-ақ қылмысқа қатысы бар тұлғаларды анықтау және жауапкершілікке тарту бағытындағы жұмыстар жалғасуда. Осыған байланысты жауапты мамандар тұрғындарға сақ болуды ескертеді.

Дәурен Мұханбетәлиев, облыстық ПД Киберқылмысқа қарсы іс-қимыл басқармасының жедел уәкілі:

Өздерін банк қызметкері болып немесе ішкі істер органдары қызметкері болып, қоңырау шалатын алаяқтар бар. Олар ең алдымен СМС-код сұрап, осы азаматтардың атына несие рәсімдетіп алады. Әрі қарай ақша-қаражаттарын ортадағы дропперлер арқылы өздерінің криптовалют есепшоттарына аудартып жатады.