Астана мен Сеул стратегиялық серіктестікке серпін бермек

Үндістандағы БРИКС саммитінен кейін Мемлекет басшысының Азиядағы сапары Сеулде жалғасты. Президент борты Корея астанасына кеше түнде келіп қонды. Бұл – мемлекеттік сапар. Сондықтан күн тәртібінде саяси кездесулермен қатар нақты экономикалық жобалар да бар. Жұмыс кестесі өте тығыз. Ал сапардың алғашқы күні екі ел арасындағы достықты жылдар бойы жалғап жүрген азаматтарға арналды. Корей қайраткерлерімен кездесуде Қасым-Жомарт Тоқаев ресми Сеулді Қазақстанның стратегиялық серіктесі деп атады. Президент екіжақты байланыстың ауқымы жылдан-жылға кеңейіп келе жатқанын айтты.

Мемлекеттеріміз арасында терең саяси диалог орнады. Сауда-экономикалық қарым-қатынас қарқынды дамып келе жатыр. Біз машина жасау, энергетика, металлургия, озық технология және басқа да салада бірқатар ірі жобаны жүзеге асырып жатырмыз. Әлемге танымал корей компаниялары елімізде табысты жұмыс істеуде. Мәдени-гуманитарлық байланысымыз да күшейді.

Іс-шара барысында Корея Ұлттық жиналысының депутаттары, Сеул кибер университетінің ректоры мен көпбейінді клиника басшысы екінші дәрежелі «Достық» орденімен марапатталды. Құрметке бөленгендердің арасында Хангук шет тілдері университетінің профессоры Сон Ён Хун да бар. Ол жиырма жылдан бері Кореяда қазақ тілінен дәріс береді. Профессордың айтуынша, қазақ және корей тілдерінің ұқсастығы көп. Сондықтан қазақ тілін меңгеру корей жастарына аса қиындық туғызбайды. Ғалым ұлы дала мәдениеті мен рухын корей жастарына кеңінен танытуды мақсат еткенін айтады.

Жалпы, қос ел білім-ғылым саласындағы әріптестікті күшейтіп келеді. Мәселен, Қазақстанда KAIST Kazakhstan институтын құру жоспарланған. Жоба кореялық ғылыми және инженерлік тәжірибеге сүйенеді. Мұнда жасанды интеллект пен ақпараттық технологиялар бойынша мамандар даярланады. Инженерия мен қолданбалы ғылымға да басымдық берілмек. Сонымен қатар Корея елімізде сирек металдарды зерделейтін зертхана ашуға грант бөліп отыр.