Жыл соңына дейін 185 мың шақырым жол цифрландырылады

Премьер министр Олжас Бектенов автожол, теміржол және авиация салаларында енгізіліп жатқан заманауи цифрлық шешімдермен танысты. Елімізде аталған салаларды цифрландыру жұмыстары қарқын алып келеді. Мәселен, автожол бағытына жасанды интеллектімен жұмыс істейтін бейнебақылау жүйесі енгізіліп жатыр. Ол заңбұзушылықтарды анықтап, жол-көлік оқиғаларының алдын алуға мүмкіндік береді. Алдағы уақытта авиацияда жолаушыларды жылдам тексеретін және шетелдік туристерге электрондық рұқсат беретін жүйелер қолданылса, теміржолда пойыздар мен вагондардың техникалық жағдайын қашықтан бақылау мүмкіндігі пайда болады. Бұдан бөлек, алдағы үш жылда 2 мың 200 шақырым жаңа теміржол салып, транзит көлемін 77 миллион тоннаға дейін арттыру жоспарланған.

E-Joldar жүйесі жолдардың сапасын бақылауға мүмкіндік береді. Ол трасса жағдайын, қолданылған материалдардың деңгейін және жөндеуге кеткен шығындарды қадағалайды. Қазірдің өзінде 41 мың шақырымнан астам магистраль цифрландырылды. Жыл соңына дейін еліміздегі 185 мың шақырым жолдың барлығын автоматтандыру жоспарланып отыр.

Smart Cargo – халықаралық жүк тасымалын онлайн бақылауға мүмкіндік беретін цифрлық платформа. Жүйеге 58 цифрлық сервис біріктірілген. Соның арқасында тауардың қай жерде екенін және оның қозғалысын толық бақылауға болады. Жүктердің шекарадан өту жылдамдығы 30%-ға артып, бақылау пунктінде кезекте тұру уақыты 10 есеге қысқарды.