Алматыда самокаттарға қатысты рейдтер жалғасып жатыр

Алматыда полиция қызметкерлері профилактикалық рейдтер өткізіп, электрлі самокаттар мен өзге де жеке мобильділік құралдарын пайдаланушыларға жол қозғалысы ережелерін сақтау қажет екенін еске салады.

Қалада электросамокаттар мен басқа да жеке мобильділік құралдарын қауіпсіз пайдаланудың мәдениетін қалыптастыруға бағытталған профилактикалық жұмыстар жалғасып жатыр.

Полицияның хабарлауынша, электрлі самокаттардың танымалдығы артқан сайын оларды пайдаланушылардың жол қозғалысы ережелерін сақтау жауапкершілігі де артты. Түсіндіру жұмыстары тұрақты жүргізілгеніне қарамастан, жол-көлік оқиғаларына себеп болуы мүмкін құқықбұзушылықтар қатары азаймай отыр.

«Бүгінде электрлі самокат күнделікті қатынас құралына айналды. Алайда қауіпсіздік әр адамның жеке жауапкершілігінен басталады. Біз бір самокатқа екі, тіпті үш адамның мінуі, көлемді жүк тасымалдауы, жол қозғалысы ережелерін елемеуі сияқты жағдайлармен жиі кездесеміз. Мұндай заң бұзушылықтар жол-көлік оқиғаларының қаупін айтарлықтай арттырады. Барлық пайдаланушыларды белгіленген ережелерді сақтауға, жол қозғалысының өзге қатысушыларына құрметпен қарауға және қабылданып жатқан барлық шараның басты мақсаты – адамдардың өмірі мен денсаулығын сақтау екенін ұмытпауға шақырамыз», – деді Алматы Полиция департаментінің профилактикалық жұмысты үйлестіру басқармасы бастығының орынбасары Рүстем Әбдіғалиев.