Түркістанда қоршаған ортаны ластағандарға 65 миллион теңге айыппұл салынды

Түркістан облысында ауаны түтінмен ластаған жылыжайларға жаппай сүзгі орнатылады. Өңірде қыс бойы көмір жағатын жылыжай иелеріне шағым көбейген. Енді облыстық Экология департаментінің мамандары жылыжай қазандықтарына арнайы сүзгі орнатуды міндеттеп отыр. Жалпы, жыл басынан бері экологтар табиғатты ластағандарға 65 миллион теңгеге жуық айыппұл салды. Полигондарды ретсіз өртеген жәйттер де кездескен. Алдағы уақытта экологтар ірі кәсіпорындарға рейд өткізіп, алынған сынама нәтижелерін әлеуметтік желіде ашық жарияламақ.