Президент NVIDIA және Firebird AI компанияларының өкілдерін қабылдады

Мемлекет басшысы NVIDIA және Firebird AI компанияларының өкілдерін қабылдады. Әңгімелесу барысында жасанды интеллект инфрақұрылымын жобалау, салу және пайдалану бағытындағы серіктестік перспективасы талқыланды. Қасым-Жомарт Тоқаев Қазақстан алдағы үш жылда толық цифрлық елге айналуды көздеп отырғанын жеткізді. Президенттің айтуынша, NVIDIA технологиясы негізінде суперкомпьютер кластерлерін іске қосу аталған мақсатқа жету және елдің технологиялық дербестігін нығайту ісіндегі маңызды қадам болды. Сонымен бірге, Мемлекет басшысы Екібастұзда Деректерді өңдеу орталығы алқабын құру бойынша стратегиялық жоба қолға алынғанына тоқталды. Онда есептеу инфрақұрылымын дамытқысы келетін инвесторларға қолжетімді электр энергиясы, телекоммуникация желісі және салық жеңілдіктері қарастырылады. NVIDIA және Firebird AI өкілдері Арменияда осыған ұқсас жобаны жүзеге асырып жатқаны жайында айтты.Кездесу соңында Қасым-Жомарт Тоқаев пен компания өкілдері жасанды интеллект экожүйесін дамыту бағытындағы бірлескен бастаманы іске асыру мүмкіндіктерін зерделеуге келісті.