Қызылордада «Green Aral» апталығы өтіп жатыр

Қызылордада «Green Aral» халықаралық волонтерлар апталығы өтіп жатыр. Сыр өңіріне елімізден және Өзбекстан мен Қырғызстан мемлекеттерінен барлығы 600-ге жуық ерікті жиылды.

Бұл Арал өңірінің тағдырына ортақ жауапкершілікті сезінуге үндейтін маңызды бастама. Бүгінде экологиялық апат аймағы ғаламдық өзекті мәселеге айналып, әлем назарын аударып отыр. Бір апталық іс-шаралар жоспарында волонтерлар облыс төңірегін аралап, экологиялық мәдениетті қалыптастыруды насихаттамақ. Сондай-ақ ерікті жастар Арал теңізінің құрғаған табанына барып, мыңдаған түп сексеуіл көшеттерін егеді.

Тоғжан Зейденова, Мәдениет және ақпарат министрлігі азаматтық қоғам істері комитеті төрағасының орынбасары:

Форум аясында ел өңірлерінен және Өзбекстан, Қырғызстан елдерінен келген волонтерлар өзара тәжірибе алмасып, әріптестік орнатып және әрі қарай игі бастамаларға бастау алады деген ойдамыз.