Электр самокаттарға бақылау күшейеді

Алматыда электросамокаттарды пайдалану тәртібі қатаңдайды. Қалалық Көлік басқармасы микромобильді көлік құралдарына қатысты жаңа шектеу шараларының енгізілетінін хабарлады. Бұл шешім, ең алдымен, жол қауіпсіздігін арттырып, ретсіз қозғалысты жүйелеуге бағытталған. Енді электросамокаттарды пайдалану үшін жергілікті атқарушы органдардың келісімі қажет. Қала билігінің айтуынша, бұл толық тыйым емес. Негізгі мақсат – бақылаусыз қызмет көрсетіп келген компаниялардың жұмысын  заң аясында ретке келтіру. Айта кетейік, тексеріс барысында кейбір компанияның рұқсатсыз жұмыс істеп жатқаны анықталған. Осыған байланысты қала көшелеріндегі бей-берекет жатқан, рұқсаты жоқ компаниялардан самокаттар алынып жатыр.