Ерванд Ильинскийге «Қазақстанның Еңбек Ері» атағы берілді

Президент Жарлығымен альпинизм саласының ардагері Ерванд Ильинскийге «Қазақстанның Еңбек Ері» атағы берілді. Жоғары марапат оған спорттағы елеулі жетістіктері, саланы дамытуға сіңірген еңбегі және белсенді қоғамдық қызметі үшін табысталды. Отандық альпинизмнің көрнекті өкілі, тәжірибелі бапкер 40 жылға жуық уақытын осы салаға арнаған. Бүгінде 85 жасқа келген спорт шебері – халықаралық дәрежедегі маман, ҚазКСР-нің еңбек сіңірген жаттықтырушысы және КСРО-ның бірнеше дүркін чемпионы. Ол Қазақстанда альпинизм мектебінің қалыптасуына айрықша үлес қосып, 100-ден аса спорт шеберін тәрбиеледі. Оның жетекшілігімен ұлттық құрама әлемдегі ең биік сегіз мыңдық 14 шыңды бағындырды.Бұл марапат – тек бір адамның еңбегіне берілген баға емес, тұтас қазақ альпинизмінің жетістігін айқындайтын маңызды оқиға. Ерванд Ильинскийдің өмір жолы – табандылық пен адал еңбектің айқын үлгісі. Қарт альпинист өзіне көрсетілген құрмет үшін ризашылығын білдіріп, алдағы уақытта да биік мақсаттардан бас тартпайтынын жеткізді. Оның ендігі арманы – Тянь-Шаньдағы 7439 метрлік «Жеңіс шыңын» бағындыру.

Ерванд Ильинский, Қазақстанның Еңбек Ері:

Бұл марапат мен үшін күтпеген әрі өте қуанышты жаңалық болды. Еңбегімді жоғары бағалаған Мемлекет басшысына алғыс айтамын. Мұндай құрмет маған ғана емес, менімен бірге еңбек еткен шәкірттерім мен әріптестеріме көрсетілген сенім деп білемін. Енді сол сенімге лайық болу үшін әлі де еңбек ете беремін.