Курчатов қаласына «ғылым қалашығы» мәртебесі беріледі

«Ғылымды арқау еткен аумақ құру – біздің стратегиялық басымдыққа ие мақсатымыз». Алматыға жұмыс сапарымен барып, Әл-Фараби атындағы Қазақ ұлттық университетінің ғылыми әлеуетімен танысқан Президент осылай деді. Мемлекет басшысының пайымдауынша, ғылым қалашықтары мен қарқынды дамитын қалалар инвестиция және жаңа технологияларды тарту орталығына айналуға тиіс. Осы міндетті іске асыру үшін тиісті тұжырымдама қабылданды. Бұл концепцияға сәйкес мықты ғылыми- технологиялық парктер құру жоспарланып отыр.
Қасым-Жомарт Тоқаев, Қазақстан Республикасының Президенті:

Менің тапсырмам бойынша Курчатов қаласына ғылым қалашығы мәртебесін беру жұмысы басталып кетті. Парламент осындай қалашықтардың құқықтық мәртебесін және қаржыландыру тетіктерін айқындайтын заң жобасын қарап жатыр. Ғылымды арқау еткен аумақтар құру – біздің стратегиялық басымдыққа ие мақсатымыз. Жаңа Конституцияда қарқынды дамитын қалалар үшін арнайы құқықтық режим бекітілді. Сондықтан Alatau City жоғары технологиялар саласындағы инвесторлар үшін тартымды жобаға айналады деп сенеміз.