Қасым-Жомарт Тоқаев республикалық референдумда сұрақтарға жауап берді

Оңғар Алпысбайұлы, тілші:

Бұл Астана қаласындағы №51 референдум учаскесі. Тура осы жерде мемлекет басшысы Қасым-Жомарт Тоқаев та өз таңдауын жасап жатыр. Ал біз бірден Президенттің құжатын қабылдап, бюллетень берген комиссия мүшесімен сұхбаттастық.

Ләззат Әліпбекова, қалалық №51 референдум учаскесінің комиссия мүшесі:

Жеке куәлігі бойынша тізімнен фамилиясын тауып, дауыс беру бюллетенін бердім. Жеке куәлігін көрдім. Тарихи сәт. Өте қуаныштымын. Жүзбе-жүз көргеніме өте қуаныштымын.

- Президент мырза, сіз жаңа Конституция жобасына арналған референдум туралы жиі айтасыз. Бұл жобаның, жаңа құжаттың тарихи мәні туралы айтып өтсеңіз.

Бұл құжат тәуелсіздігімізді, егемендігімізді қорғайтын басты құжат. 1995 жылы қабылданған Конституцияның рөлі өте ерекше. Бірақ заман деген бір жерде тұрмайды. Жаңа Конституцияны қабылдайтын сәт келді. Сондықтан мен өзім жұмысқа кірістім. Конституцияның преамбуласын басқа да нормаларды өзім жаздым. Сондықтан болашақта жақсы қызмет ететініне күмәнім жоқ.

Вице-президент лауазымы туралы әртүрлі әңгіме бар. Шын мәнінде бірқатар шет мемлекетте Вице-президент лауазымы бар. Ешқандай қорқыныш болмауы керек бұл мәселе бойынша. Вице-президент деген біздің биліктің инфрақұрылымын нығайтады. Бәрі айқын болады. Мен өзім Президент ретінде бұл лауазымға, не болмаса бүкіл реформаға үлкен үмітпен қарап отырмын.