Атырау облысында мұнайшылар дауыс берді

Атырау облысында мұнайшылар дауыс берді. Өңір өнеркәсіптік аймақ болғандықтан азаматтардың басым көпшілігі вахталық әдіспен жұмыс істейді. Сондықтан кен орындарына дауыс беру жәшіктері жеткізілген. Әріптесім Нұрсұлтан Нұрсейіт тікелей байланысқа шықты. Нұрсұлтан, облыс азаматтарының белсенділігі қалай?

Иә, Альбина, аймақта дауыс беруге құқылы азаматтардың тең жартысынан көбі өз таңдауын жасады. Орталық сайлау комиссиясының 14:00-де таратқан ақпаратына сәйкес Атырау облысы тұрғындарының 56 пайызы белсенділік танытқан. Сондай-ақ саяси науқанның көрігі мұнай кен орындарында да қыза түсті. Еліміздің әр түкпірінен жиналған қара алтын қорын игерушілер қауырт жұмысқа қарамастан, дауыс берді. Оларға арнайы дауыс беру жәшіктері жеткізілген. Жылыой ауданы Теңіз кен орнындағы азаматтар таңдауын жасауы үшін уақытша 8 референдум учаскесі ашылды. Қазір онда әр түрлі мамандықтағы 10 мыңнан астам адам жұмыс істейді. Қызметкерлерді учаскелерге жеткізу үшін тегін автобустар қатынап жатыр. Сондай-ақ Қашаған, Баутин базасы, Ескене кен орындарында да 4 мыңға тарта адам өз дауыстарын беріп жатыр.