Қызылорда облысының Мергенсай ауылында мектеп ашылды

Қызылорда облысы, Арал ауданының Мергенсай ауылында жаңа мектеп ел игілігіне берілді. 150 орындық білім ордасы мемлекетке қайтарылған активтердің есебінен салынды.

Ашылу салтанатына Оқу-ағарту министрі Жұлдыз Сүлейменова қатысып, көптің қуанышына ортақтасты. Жалпы Мергенсай теңіз беткейдегі шалғай елді мекен. Бұған дейін ауыл балалары асар әдісімен салынған көне ғимаратта білім алған. Тұрғындардың көптен күткен талап-тілегі орындалып, жаңа жылда заманауи екі қабатты мектеп пайдалануға беріліп отыр. Білім ошағы «Келешек мектеп» үлгісінде салынған. Сыныптар оқу процесіне қажетті барлық құрал-жабдықтармен қамтылған. 

Жұлдыз Сүлейменова, Оқу-ағарту министрі:

Бұл мектептің ерекшелігі – жалпы қайтарылған қаржыға салынған мектеп, біріншіден. Екіншіден, «Келешек мектебінің» стандартымен салынған мектеп. Шалғай ауылдарымызда осындай халықаралық талаптарға сай мектептердің болуы бұл білімнің сапасын арттыруға негізгі көрсеткіштердің бірі.