Зейнетақыдан ЖТС ұсталмайтын болды

Енді қазақстандықтардың зейнетақысынан жеке табыс салығы ұсталмайды. Бұған дейін барлық зейнетақы төлемдеріне 10% мөлшерінде жеке табыс салығы салынатын. Сондай-ақ бұған дейін салық төлегендерге  қаражат кері қайтарылмайды. Ал әлеуметтік осал топтарға жататын азаматтар үшін 882 айлық есептік көрсеткішке дейін салықтық шегерім жасау құқығы сақталады. Сонымен қатар, азамат Қазақстан резиденті болмаса, жеке табыс салығын төлеуге міндеттеледі.

Гүлнұр Ақайдарова, «БЖЗҚ» АҚ төлемдерді ұйымдастыру және хабарландыру департаментінің басқарма басшысы:

Жаңа жылдан бастап, жеке табыс салығы тек қана Қазақстан Республикасының бейрезиденттеріне ғана салынатын болады. Сондай-ақ 2026 жылдың 1-қаңтарынан бастап, зейнетақы жинақтарының бір бөлігін тұрғын үй жағдайын жақсарту және емделу мақсатында пайдалану кезінде кейінге қалдырылған салық міндеттемелері толығымен жойылады.Айта кететін жайт, жаңа салық кодексінде бұрын ұсталған және төленіп қойған ЖТС-ны кері қайтару көзделмеген.