Мәжілісте 3 бірдей заң жобасы қаралып жатыр

Бүгін Мәжіліс үш бірдей заң жобасын қарайды. Оның ішінде «Салық және бюджетке төленетін басқа да міндетті төлемдер» құжаты бар. Одан бөлек қаруды қылмыстық мақсатта пайдалануды шектейтін заң жобасы талқыланады. Парламенттен тілшіміз Нұрсұлтан Тілектес бізбен байланысқа шығып тұр.

Нұрсұлтан Тілектес, тілші:

Қайырлы таң, Қонысбек! Иә, бүгін «Салық және бюджетке төленетін басқа да міндетті төлемдер туралы» заң жобасы бірінші оқылымда қаралады. Сондықтан құжатқа қандай толықтырулар мен өзгертулер енгізілетінін отырыс барысында білеміз.

Қазақстан Республикасы Үкіметі мен Моңғолия Үкіметі арасындағы зейнетақы саласындағы ынтымақтастық туралы келісімді ратификациялау туралы заң жобасына келсек, бұл — екі мемлекеттің зейнетақы жүйесіндегі ынтымақтастықты рәсімдеуге арналған құжат. Мақсат — екі елдегі еңбек өтілі мен зейнетақы жарналарының есептелуін реттеу және жинақтаушы зейнетақыны экспорттау тетігін енгізу. Яғни бір елде еңбек еткен адам зейнет жасына жеткенде екінші елден төлем алу мүмкіндігіне ие болады.

Сондай-ақ «Күзет қызметі мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасы қаралады. Бұл — жеке күзет ұйымдарының қызметін лицензиялау, бақылау, өзге өңірге ауысу, қайта тіркелу, қызметін тоқтату немесе қайта бастау тәртібін реттейтін өзгерістерді қамтиды.

Мәжілістің жалпы отырысы қазір ғана басталды. Қандай өзгерістер жоспарланып отырғаны жөнінде алдағы жаңалықтарда хабарлаймыз.