Пәкістан мен Ауғанстан шекарасы әлі жабық

Пәкістан мен Ауғанстан арасындағы «Чаман» шекара өткелі үшінші күн қатарынан жабық тұр. Бұған екі ел арасында сенбіде басталған әскери қақтығыс себеп. Тараптар атыс үшін бір-бірін айыптап отыр. «Талибан» үкіметіне сенсек, Пәкістан армиясы бейсенбіде базарды бомбалаған. Ресми Исламабад болса, ауған жағынан себепсіз жауған оққа жауап қайтарғанын мәлімдеді.

Екі жақтан да қаза тапқандар бар. Пәкістан 200-ден астам тәліпті өлтіргенін, ал Ауғанстан 58-ден астам пәкістандық сарбаздың көзін жойғанын хабарлады. Пәкістан «Техрик-е Талибан Пәкістан» тобының ар жағында Ауғанстан тұр деп есептейді. Алайда Кабул бұл ақпаратты жоққа шығарып келеді.