Газа бойынша келіссөздер үшінші күнге ұласты

Мысырдың Шарм әл-Шейх қаласында Газадағы соғысты тоқтатуға бағытталған келіссөздердің екінші күні айтарлықтай нәтижесіз аяқталған. Мұны «BBC» өз дереккөздері арқылы хабарлады. Тараптар Израильдің Газадан әскер шығару картасына қатысты ортақ пікірге келе алмаған. Бұған қоса, Хамас атысты тоқтатудың бірінші кезеңінен кейін Израиль Газада соғысты қайта бастамайды деген кепілдікті талап етті. Хамас бостандыққа шығарылатын кепілдегі израильдіктер мен палестиналық тұтқындардың тізімімен алмасқанын мәлімдеді. Арағайындар Израиль мен Хамас ұстанымын жақындату үшін барын салып жатыр. АҚШ президенті Дональд Трамп та келісім жасалуы үшін қолдан келгеннің бәрін жасаймыз деп мәлімдеді.