Жаңалықтарды Telegram арнамыздан оқыңыз!УЕФА – әлемдегі ең беделді футбол ұйымдарының бірі. Оның стадиондарға және инфрақұрылымға қоятын талаптары өте қатал. Яғни, стадионға кіре берістен бастап қонақтар, спортшылар және жанкүйерлер үшін барлық жағдай жасалуы тиіс. Алматының Орталық стадионы Чемпиондар лигасын өткізуге дайын ба?
Алматының Орталық стадионында қазір үлкен ойын алдында қызу дайындық жүріп жатыр. Чемпиондар Лигасын қабылдауға байланысты бірқатар инфрақұрылымдық жаңғырту қолға алынған. Мамандар жаттығу алаңдары мен техникалық аймақтарды ретке келтіруде. Алдағы уақытта осы алаңда еліміздің мақтанышы «Қайрат» командасы мен испаниялық клуб «Реал Мадрид» кездесуі мүмкін.
Ерлан Адамбеков, Орталық стадионның меңгерушісі:
Өздеріңіз білесіздер, стадион жаңа емес, сондықтан кейбір мәселелер бар. Дегенмен УЕФА стандарттарына сәйкес жүйелі жұмыс жүргізілуде. Спорттық нысандар мен инфрақұрылым бойынша дайындық жалғасып жатыр. Жаттығу алаңдары, төрешілерге арналған бөлмелер мен киім ауыстыру орындары қалпына келтіріледі. Жалпы алғанда, стадионның көлемі мен ойын алаңының шөбі УЕФА-ның IV санатына толық сәйкес келеді.
УЕФА талабы бойынша стадионның ең аз сыйымдылығы – кемінде 8 000 орындық болуы тиіс. VIP-қонақтарға арналған жайлы орындар қарастырылуы қажет. Сапалы телетрансляция өткізуге, сондай-ақ БАҚ өкілдерінің жұмысына жағдай жасалуы тиіс. Жарықтандыру мәселесі де маңызды. Барлық кіреберістерде электронды турникеттер орнатылып, арнайы бөлмелер жеткілікті болуы қажет.
Құралбек Ордабаев, «Қайрат» ФК Бұқаралық футбол бөлімінің басшысы:
Алматы орталық стадионы – ең жақсысы. Осындай стадиондар көп болуы керек. Неге біздің облыстарда мұндай стадион жоқ? Әрине, салынып жатыр, жасалып жатыр, бірақ көбісі жасанды алаң. Ал Әлем чемпионаттары мен Еуропада тек табиғи газондарда ойнайды. Сондықтан соған үйренуіміз қажет.
Жоғарыдағы талаптар Чемпиондар лигасының негізгі кезеңін өткізуге толық кепілдік бермейді. Сонымен қатар қала инфрақұрылымы да маңызды. Яғни, тұрақты халықаралық рейстер қабылдайтын әуежай және қарсылас команда, төрешілер мен ресми тұлғаларды орналастыратын кемінде екі бес жұлдызды қонақүй болуы тиіс.
Қуан Нұрақын
