Жаңалықтарды Telegram арнамыздан оқыңыз!Қаржы мониторингі агенттігі Шымкенттегі университеттердің бірінде ақша жымқыру схемасын әшкере етті. Тергеу барысында Мұхтар Әуезов атындағы Оңтүстік Қазақстан университетінде қызмет көрсету, құрылыс-монтаж жұмыстары және тауар жеткізуге қатысты жалған келісімшарттар жасалғаны анықталды. Іс жүзінде бұл жұмыстар мүлдем атқарылмаған. Бюджет қаржысы жалған актілер негізінде өзара ымыраласқан компаниялардың шоттарына аударылып, соңынан қолма-қол ақшаға ауыстырылған. Күдіктілер қатарында ректордың міндетін атқарушы, қаржы және әкімшілік Департаменттердің директорлары, сондай-ақ серіктес ұйымдардың басшылары бар. Олар осындай жолмен білім ордасына бөлінген 256 миллион теңгені жымқырған және оған қымбат мүліктер сатып алған.
Салтанат Көшербаева, ҚР ҚМА басқарма басшысы:
Қылмыстық жолмен алынған кірістерге күдіктілер 6 қымбат авто көлік пен Шымкент қаласының орталығынан құны 254 млн теңге болатын элиталық коттедж сатып алған. Оларға сот санкциясымен тыйым салынды. 4 күдіктіге қатысты үйқамақ түріндегі бұлтартпау шарасы қабылданды. Қылмыстық іс сотқа жолданды.
Ғани Қалмаханов
