Шымкентте жүргізуші куәлігін сатқан 12 лауазым иесі қамалды

Шымкент қаласында жүргізуші куәлігін заңсыз түрде рәсімдеп, пайда тауып келген қылмыстық топтың әрекеті әшкере болды. Қаржылық мониторинг департаменті мен прокуратура мамандары мегаполистегі 2 мамандандырылған Халыққа қызмет көрсету орталығының басшылығы және бірқатар лауазымды тұлғаларының теориялық және практикалық емтихандардан өтпей-ақ азаматтарға құжат беру схемасын ұйымдастырғанын анықтады. Олар осындай қызметі үшін екі жыл бойы әр адамнан 150 мыңнан бастап 400 мың теңгеге дейін сыйақы алып келген. Осылайша аймақта 500-ден астам азамат сынақ тапсырмастан жүргізуші куәлігін ақшаға сатып алған. Қылмыстық іс бойынша қазір сотқа дейінгі тергеу жалғасуда.

Ернар Тайжан, ҚР Қаржылық мониторинг агенттігінің ресми өкілі:

Қазіргі таңда тергеу аясында 200 млн теңгеден астам сомаға бағаланған күдіктілердің мүлкіне 2 жеке үй, 2 пәтер, 2 жер телімі және 10 автокөлікке тәркілеу мақсатында тыйым салынды. Соттың санкциясымен 12 күдіктіге қатысты қамауға алу түріндегі бұлтартпау шарасы қолданылды.

Ғани Қалмахан