Жаңалықтарды Telegram арнамыздан оқыңыз!Атырау облысы Қызылқоға ауданында қарғын судан қауіп әлі сейілмей тұр. Қазір қауіпті учаскелер қатаң бақылауға алынған. Ойыл өзенінің деңгейі бүгін 562 см. Қауіпті деңгейге 4-ақ см жетпей тұр. Ал Сағыз, Ноғайты өзендерінде жағдай тұрақты. Әріптесім Нұрсұлтан Нұрсейіт ауданға барып жағдаймен танысып қайтты.
Нұрсұлтан Нұрсейіт, тілші:
Жауаптылардың айтуынша, биыл су былтырғыдан екі есе аз келген. Алайда босаңсуға әлі ерте деп, бөгеттердің осал тұстары қосымша нығайтылып, арнайы тәуліктік кезекшілік ұйымдастырылған. Мен қазір Қарабау-Индер бағытына қарай қатынайтын «Кенен» көпірінің тұсында тұрмын. Бұл жер қауіпті учаскелердің бірі болғандықтан, жүк көліктеріне өтуге тыйым салынған.
Өзеннің деңгейі әр екі сағат сайын тексеріліп отыр. Бөгет басында 150-ге жуық адам мен 66 техника жұмыс істеп жатыр. Ал көмекке келген Ұлттық ұланның 60 жауынгері 18 мың қапшыққа құм толтырып, қауіпті учаскелерге төсеген.
Бақтыбек Төлегенов, аудандық ТЖБ басшысы:
Ойыл өзенінің деңгейі қазір 5 метр 62 см-ді құрап отыр. 2 см-ге түскенін көріп отырмыз. Ералы су торабынан су деңгейі 1 метр 70 см жылдамдықпен ағуда. Сағыз, Ноғайты өзендері бірқалыпты. Ешқандай қауіп жоқ десек те болады.
Бүгінге дейін 9 ауылдық округті қоршай 54 шақырымнан астам бөгет соғылып, былтыр бұзылған учаскелер қайта жөнделді. Биылғы тасқыннан қорғану шараларына облыстық бюджеттен 900 млн теңге қаражат бөлінген. Жалпы, Ойыл өзенінің ұзындығы 276 шақырым болса, оның 100 шақырымы тайызданып кеткен. Сондықтан әкімдік арнаны тазалап, тереңдетіп жатыр.
Қанат Әзмұханов, Қызылқоға ауданының әкімі:
Қазір 7 км жұмысын жүргіздік. Судың келуіне байланысты техникалардың бәрін тоқтаттық әзірге. Енді жақын арада олар әрі қарай жұмысын жалғастырады. Ойыл арнасын тазалап, кеңейткеніміздің нәтижесінде Миялы ауылының жағасына, дамбыға келмей тұр.
Ойыл өзеніне биыл да мол су келді. Ералы су торабынан наурыз айы басталғалы бүгінге дейін 250 миллион текше метрге жуық су өткен. Ауыл шаруалары осыны пайдаланып, шабындыққа, жайылымға су шығарып алып жатыр.
Өтеуғали Дүйсәлі, Миялы ауылының тұрғыны:
Келіп жатқан суды біз ауыл шаруашылықты аудан болған жерде, мал бағатын болғасын, тиімді пайдалану жолдарын қарастырып жатырмыз. Далаға кетіп, ысырап боп жатқан қазір су жоқ. Шабындық жайлы болады деген ойдамыз.
Төтенше жағдай қызметі мамандарының мәліметінше, бір апта ішінде су деңгейі түсіп, қауіп толық сейіледі. Ал жүк көліктері үшін қозғалыс шектелген «Кенен» көпірі жағдай тұрақталған соң, түгел бұзылып, орнына жаңасы салынады.
Нұрсұлтан Нұрсейіт
