Жаңалықтарды Telegram арнамыздан оқыңыз!Маңғыстауда «Ақтау - Түркі әлемінің мәдени астанасы» жылының ашылу салтанатына дайындық қыза түскен. Шараға түркі мемлекеттерінен 100-ге тарта лауазым иесі мен халықаралық ұйымдардың басшылары келмек. Осыған орай Ақтауда Каспий теңізінің жағалауына 30-ға жуық киіз үй тігіліп, алып сахна бой көтерді. Дайындық жұмыстарына 1500 адам атсалысып жатыр. Әзірлік барысы туралы Аягөз Оралбайқызы тарқатып айтады.
Аягөз Оралбайқызы, тілші:
Жаңа сахна үлкен лэд экрандармен жабдықталған. Безендірілуі де ерекше, Маңғыстаудың Бозжыра сияқты атақты таулары бейнеленген. Осы жерде 1 мыңнан астам отандық және шетелдік әртіс өнер көрсетеді. Сонымен қатар, «ТҮРІКСОЙ-ға» мүше мемлекеттердің делегаттарының шеруі өтіп, театрландырылған тарихи қойылымдар қойылмақ.
Ресми ашылу салтанатына дейін жиналғандар «Дархан дала» этноауыл қалашығында қазақ халқының салт-дәстүрі, әдеп-ғұрпы мен мәдениетімен танысады. Ол үшін 30-ға жуық киіз үй тігілді. Сол киіз үйлердің бірін Шетпелік Қарашаш Іленова арнайы дайындап әкелген.
Қарашаш Іленова, Шетпе ауылының тұрғыны:
Осы шара болады дегеннен күндіз-түні үйімді дайындап, үзігімді жаңадан басып, қолөнерімді аямай жасадым. Мына шашақтарымды жаңартып жасадым, үйімнің бау-шуларын да жаңарттым. Немерем бар, балаларым бар - бәріміз бірігіп, осы үйді тігіп болдық.
7 этно қалашықтың алтауында жергілікті қолөнер шеберлерінің туындылары қойылған көрме-жәрмеңкелер ұйымдастырылады. Ал жетінші этноауылда түркі елдердің ұлттық бұйымдары қойылмақ. Қызу дайындықты көрген тұрғындар да айтулы шараны асыға күтуде.
Даржок Сейбағытұлы, қала тұрғыны:
Халықты бір-біріне жақындататын, түркі әлемі деген дүниежүзіне белгілі, түрік тілде сөйлейтін халық көп. Осы халықтардың бір-біріне жақындығы, елдің тыныштығы, елдің экономикасы, әлеуметінің жақсаруына әсер етеді деп мен ойлаймын. Бізге келіп жатқанына қатты қуаныштымыз.
Шараға«ТҮРІКСОЙ-ға» мүше елдердің мәдениет министрлері, халықаралық ұйымдардың басшылары, қоғам қайраткерлерін қосқанда шамамен 100-ге жуық адам келеді деп күтілуде. Шетелдік қонақтарға 150 волонтер мен 30 аудармашы қызмет көрсетеді.
Нұртас Сали, Маңғыстау облыстық мәдениет, тілдерді дамыту және архив істері басқармасының басшысы:
Мұндай ірі шаралар өтетін аумағына серпін береді деп есептейміз. Оның ішінде тарихты, мәдениетті қозғап отырмыз, жалпы, келген қонақтардың көзқарасы өзгереді. Өңірге әлеуметтік, экономика, туристік жағынан зор серпін береді есептейміз.
Айта кетейік, «Ақтау - Түркі әлемінің мәдени астанасы» жылы сәуірдің 5-і күні ресми ашылады. Одан әрі жыл соңына дейін 30-ға жуық халықаралық деңгейдегі шаралар жоспарланған.
Аягөз Оралбайқызы
