Жаңалықтарды Telegram арнамыздан оқыңыз!Дәл қазір Астанада қазақ музыкасының дара тұлғасы, даңқты композитор әрі дирижер Нұрғиса Тілендиевтің 100 жылдығына арналған «Әлқисса – Нұрғиса» атты мерейтойлық концерті өтіп жатыр. Осылайша, ғасырлық мерейтой аясындағы ауқымды іс-шаралар ресми түрде бастау алды. Әдемі кештен әріптесім Шерхан Жамбылұлы тікелей байланысқа шығып отыр. Шерхан бұл концерттің ерекшелігі неде?
Шерхан Жамбылұлы, тілші:
Иә, Армангүл, дәл қазір Орталық концерт залының сахнасында ұлы сазгердің жауһар туындылары шырқалып жатыр. Қазақ музыкасының тарихында қайталанбас қолтаңба қалдырған Нұрғиса Тілендиев – ел руханиятының биік шыңы. Оның «Ата толғауы», «Аққу» сынды күйлері, «Куә бол», «Құстар қайтып барады» сияқты әндері халық жадында мәңгілікке сақталды. Оған бүгін тағы да көз жеткізіп отырмыз. Көрермендер әншілермен бірге осы туындыларды қосылып шырқап жатыр. Ендеше концерттен үзінді тыңдасақ.
Шерхан Жамбылұлы, тілші:
Өнер кешінің аурасы мен атмосферасы бөлек. Күй мен әнге тұнған рухани кеш. Бүгінгі кеште эстрада, опера және дәстүрлі ән өнерінің майталмандары сахнаға шықты. Сонымен қатар кезінде Нұрғиса Тілендиевтің өзі негізін қалаған «Отырар сазы» академиялық халық аспаптар оркестрі және симфониялық оркестр мен хор капелласы бірлесіп өнер көрсетіп жатыр.
Шерхан Жамбылұлы, тілші:
Кеш аяқталуға жақын. Бірер сәттен соң ұлы тұлғаның құрметіне Мемлекет басшысының атынан гүл шоқтары табыс етіледі. Сөз басында айтқандай, бұл композитордың мерейтойына арналған іс-шаралардың бастауы ғана. Жыл бойы Қазақстанның барлық өңірінде 100-ге жуық іс-шара өтеді. Мерейтойлық бағдарламаның басты іс-шарасы – Қазақстанның Мәдениет күндері аясында Франциядағы ЮНЕСКО штаб-пәтерінде өтетін Нұрғиса Тілендиевтің 100 жылдығына арналған салтанатты концерт. Сондай-ақ АҚШ-та, әйгілі Карнеги-холда концерт пен көрме ұйымдастырылса, Бейжіңде «Құстар қайтып барады» концерті аясында композитордың әндері орындалады. Осылайша қазақ мәдениетінің көрнекті тұлғасының мерейтойы халықаралық деңгейде аталып өтпек.
Шерхан Жамбылұлы
