Жаңалықтарды Telegram арнамыздан оқыңыз!Қазір интернет бетінде ненің шын, ненің өтірік екенін ажырата алмай барамыз. Жасанды интеллектіні пайдаланып, алаяқтық жасап, жалған ақпарат таратып, түрлі қылмыс жасалып жатыр. Осылай деген депутаттар жасанды интеллектіге қатысты сын мен күдігін жеткізді. Бүгін Мәжілісте «Жасанды интеллект туралы» заң жобасы мен ілеспе құжат таныстырылды. Мәжілісмендер баяндамашыға сұрақ қойып, қауіп-қатердің көптігі жайлы айтты. Тілші толықтырады.
Жасанды инттелекті – интелектуалдық деградацияға апарады. Депутат Анас Баққожаев осындай пікір білдірді. Тіпті шенеутіктерге Chat GPT-ді шектеу керек дейді.
Анас Баққожаев, ҚР Парламенті Мәжілісінің депутаты:
Министрліктерде, мемлекеттік органдарда осы ЖИ пайдалануын кім қадағалап жатыр? Қайда ол? Бар ма, жоқ па? Қаншама материалдар кетіп қалған кім біледі? Ертең соның бәрін өзімізге қарсы пайдаланады. Пайдаланбай-ақ қойсын, бірақ Қазақстанда қандай мәселелер бар екендігін білген басқа мемлекеттер, бенефициарлар бізді айналып өтеді.
Депутаттар мектептегі мәселеге де мән берді. Себебі оқушылар қазір ойланудан қалған. Тапсырманы өз білімімен емес, жасанды интеллектінің көмегімен ғана орындайды. Сондықтан шектеу керек дейді олар. Баяндамашы болса былай жауап берді.
Екатерина Смышляева, ҚР Парламенті Мәжілісінің депутаты:
Балаларға қатысты кез келген шектеу шаралары әуелі ата-аналарға артылатын жұмыс. Себебі балаларды жасанды интеллектіден шектеуден біздің басқа амалымыз жоқ. Ата-аналар мұндайға қаншалықты дайын? Олар тексеріп, зерттеп жүре ме? Біз бұл мәселелерді қарап, нақты нәтиже беретін шектеу тетіктерін заңға енгіземіз.
Жасанды интеллекті еңбек нарығы саласына соққы болғалы тұр. Дүниежүзілік экономикалық форумның дерегі бойынша, ЖИ әлемде 90 млн жұмыс орнын алмастырмақ. Қазірдің өзінде Қазақстанда бір миллион адам жұмыссыз жүр дейді Елнұр Бейсенбаев.
Елнұр Бейсенбаев, ҚР Парламенті Мәжілісінің депутаты:
Бізде әлі күнге дейін жұмыссыздық мәселесі өршіп тұр. Үкіметтің ұстанып, бюроның беріп жатқан ақпараты мүлдем сай келмейді. Пандемия уақытында 5 пайыз көрсеткен, әлі 5 пайыз көрсетіп тұр. Ешкім сенбейді ғой. Мына дүние енетін болса біз біршама азаматтың жұмыссыз қалуына тағы да түрткі боламыз ғой.
Ал жасанды инттеллектімен күнделікті жұмыс істейтін маман, білікті дизайнер Алпамыз Батқалов депутаттардың шектеу керек деген пікірімен келіспейді.
Алпамыс Батқалов, дизайнер, ІТ маманы:
Шектей салу дұрыс жаққа әкелмейді. Өйткені жасанды интеллекті бұрын адамзатқа жетпеген... Мысалы ауылды жерде заманауи кітапхана бар ма, жоқ. Интернет бар ма, бар! Сонда жаңағы программаларда керекті ақпаратты жинақы, қорытынды, сараптама ретінде адам өзіне қабылдап, жеке дамуына жақсы әсер береді.
Заң жобасындағы негізгі тетіктерді тарқатсақ. Қазақстан аумағында адамның араласуынсыз шешім қабылдайтын жүйелерді құруға және енгізуге тыйым салынады. Сондай-ақ ең бастысы азаматтардың жеке деректерін қорғауға баса мән беріліп отыр.
Азамат Бейбітұлы
