Жаңалықтарды Telegram арнамыздан оқыңыз!Шымкент қаласында қалың қардың еруі мен жауын шашынға байланысты су басып қалу қаупі бар бірнеше аймақ анықталды. Апаттың алдын алу үшін қазір өзендердің арнасын бекітіп, жағасын нығайту жұмыстары басталды.
Ғани Қалмаханов, тілші:
Шаһар аумағында тасқын су басып қалуы мүмкін 20 қауіпті аймақ анықталды. Оның басым бөлігі Сайрамсу өзені бойында. Мұнда арна 15 үйдің тап іргесінен өтеді. Қауіпті аймақтарда 100-ге жуық адам тіршілік етеді. Мамандар қазір ахуал қорқыныш туғызбағанымен, жауын-шашын көбейетін болса, жағдайды қиындатып жіберуі мүмкін екенін айтады. Сондықтан жағалаулар қоқыстан тазартылып, Бадам өзенінің арнасын бекіту және бетондау үшін 5 миллиард теңге қаржы жұмсалды. 167 эвакуациялық пункт дайындыққа келтірілді. Сондай-ақ 15 арнайы техника, 26 мотопомпа және 7 суда жүзу құралдары әзір тұр. Төтенше жағдайлар қызметі 6-7 ақпан күндері командалық-штабтық оқу-жаттығу өткізуді жоспарлап отыр.
