Шымкентте ауаны шектен тыс ластаған 7 кәсіпорынның жұмысы тоқтатылды

Шымкентте зиянды қалдықтар шығарып, ауаны шектен тыс ластаған 7 кәсіпорынның жұмысы тоқтатылды. Сондай-ақ, экология талаптарын бұзған 38 өндіріс орнына 284 миллион теңге айыппұл салынды. Тексеріс барысында олардың мұржаларға тазалау қондырғыларын орнатпағаны, зиянды қалдықты шекті мөлшерден асырып жібергені және экология департаментінен рұқсат алмағаны белгілі болған.

Мегаполистегі ең ірі 4 кәсіпорын: цемент шығаратын екі өндіріс орны, Шымкент мұнай өңдеу зауыты мен жылу энергоорталығы жылына ауаға 500 тоннаға дейін улы қалдықтар таратады. Сондықтан оларға автоматты түрде мониторинг жасайтын жүйе орнату міндеттеліп отыр. 

Сабырбек Балыбек, Шымкент қаласы бойынша Экология департаменті басшысының орынбасары:

Экологиялық рұқсатсыз жұмыс істеген 7 кәсіпорынның сот арқылы жұмысы уақытша тоқтатылған. Яғни тексеру барысында қосымша ластау көздерін рәсімдемеген немесе тазалау қондырғысын орнатпаған.  Осы заңбұзушылық үшін сотқа талап арыз жолдадық.

Ғани Қалмахан