Бельгиядағы ереуілшілердің кесірінен әуе рейстері кейінге қалды

Бүгін Бельгияның екі әуежайынан ұшатын барлық әуе рейс кейінге шегерілді. Салдарынан 40 мыңнан астам адам жолдарынан қалды. Себебі әуежай қызметкерлері жұмысты тоқтатып, ереуіл ұйымдастырып жатыр.

Нұрсұлу Қасым, тілші:

Әуежайдың тазалықшылары, қауіпсіздік қызметінің агенттері, мейрамхана, қонақ үй бизнесінің өкілдері жалақыны көтеруді, жұмыс істеуге қолайлы жағдай жасауды талап етіп, ереуілдетіп жатыр. Тек бельгиялықтар ғана емес, қарт құрлықтың 8 мемлекетінен кәсіподақ ұйымының мүшелері келген. Олар Еуропалық Одақтың «мемлекеттік сатып алу» туралы заңына өзгеріс енгізу қажеттігін айтады.

Конрад Мартенс, кәсіподақ ұйымының хатшысы:

Жұмысшылардың жалақысы мардымсыз, жұмыс жасауға еш жағдай жасалмаған. Тендерден ең төмен, арзан баға ұсынатын компаниялар ғана өтіп, тиісінше олар қызметкердің құқығын аяққа таптап отыр. Заңға түбегейлі өзгеріс керек.

Нұрсұлу Қасым, тілші:

Осы ереуілдің кесірінен бүгін Брюссель және Шарлеруа қаласының әуежайынан ұшуы тиіс барлық рейс кейінге шегерілді. Салдарынан 40 мыңнан астам адам жолынан қалды. Жолаушылар бүгін әуежайға түнеуге мәжбүр. Левен католик университеті мамандарының мәліметінше, бүгінгі бір күндік ереуілдің кесірінен ел экономикасына 20 млн еуро шығын келген.