Бельгияда зауыт жұмысшылары ереуілге шықты

«Audi» автоконцерні Бельгия астанасы Брюссельдегі зауытын жаппақ. Салдарынан 3 мыңнан астам адам жұмыссыз қалуы мүмкін. Зауыт жұмысшылары осыған қарсы Брюссельде наразылық шеруін өткізді. Концерн қызметкерлеріне Нидерланд, Германия мен Бельгияның түпкір-түпкірінен 5 мыңнан астам адам қолдау көрсетуге келді. Еуропалық парламент алдына жиналған шерушілер биліктегілерден Қытайлық демпингке қарсы шара қолдануды, Еуроодақтың өндірістік саласына 800 млрд еуро инвестиция құюды талап етті.

Диего Морис, кәсіподақ ұйымының өкілі:

Қытай мен Азия елдерінің арзан көліктерінің кесірінен Еуропаның өндірістік саласы бәсекеге төтеп бере алмай, құрдымға кетіп барады. Құтқармаса болмайды.

Жанин Мальпик, компанияның қызметкері:

Бұл сұмдық қой, мен өмірімнің 20 жылын осы зауытқа арнадым. Жұмыссыз қалсам, бала-шағамды қалай асыраймын!?

Нұрсұлу Қасым