Президент Башқұртстан басшысы Радий Хабировты қабылдады

Қазақстан мен Башқұртстан арасындағы тауар айналымы 350 млн доллардан асты. Бүгінде Башқұрстан еліміздің жетекші сауда серіктестерінің үштігіне кіреді. Мемлекет басшысы Қасым-Жомарт Тоқаев Башқұртстан Республикасының басшысы Радий Хабировты қабылдап, екіжақты қарым-қатынастағы экономикалық байланыстың маңызына тоқталды.

Кездесуде сауда-экономикалық, мәдени-гуманитарлық, өнеркәсіп және басқа да салаларды өзара дамыту мәселелері талқыланды. Мемлекет басшысы бірқатар екіжақты келісімдердің, соның ішінде үкіметтер деңгейінде қол қойылған 2023-2024 жылдарға арналған жол картасының табысты жүзеге асырылып жатқанын ерекше атап өтті.

Өз кезегінде Радий Хабиров қазақ жерінде қонақжайлық көрсеткені үшін алғыс айтты.

Қасым-Жомарт Тоқаев, Қазақстан Республикасының Президенті:

Қазақстан мен Ресей арасындағы жан-жақты қатынастарға тың серпін беру тұрғысынан алғанда бүгінгі сапарыңыздың мәні зор. Біз индустрия, агроөнеркәсіп кешені және гуманитарлық салалардағы байланыстарымызды әртараптандыру үшін барынша күш саламыз.

Радий Хабиров, Башқұртстан Республикасының басшысы:

Башқұртстан мен Қазақстан арасындағы қарым-қатынасты дамытуға ерекше мән беретініңізді білеміз. Менімен бірге үлкен делегация келді. 2-3 жылдың ішінде біз тауар айналымы мен өнеркәсіп кооперациясының көлемін айтарлықтай ұлғайттық. Бүгін «Қазақстан – Башқұртстан» форумын аштық. Біз үшін Қазақстан – ең басты серіктес. Біз мұнда өзімізді еркін сезінеміз.