Жаңалықтарды Telegram арнамыздан оқыңыз!Қарағанды облысының Қарқаралы қаласында тұрғындарға шапқан қасқыр атып өлтірілді. Бүгін таңертеңгілік түз тағысы үш адамды жарақаттаған. Бірінің азу тиген жарақаттары тым терең. Полиция бөлімінің 4 көлігі мен 25 қызметкері, ветеринарлар және орман шаруашылығының мамандары күні бойы қала ішіне кірген бөріні ұстаумен айналысты. Таулы-орманды өлкеде боран соғып тұрғандықтан ізге түсу қиынға соқты,-дейді мамандар. Үрейлі жұрт балаларын сабаққа жібермеген. Айта кету керек, қасқыр қорадағы малға да шапқан.
Нұрболат Баймұрынов, Қарқаралы аудандық ауруханасының хирург-дәрігері:
Үш пациентке де керек деңгейінде медициналық көмек жасалып, вакциналар салынды. Пациенттер амбулаторлық ем алады. Қазір үйлеріне жіберілді. Өмірлеріне қауіп төніп тұрған жоқ. Өзге қала тұрғындарынан мұндай шағымдар болған жоқ.
Руслан Нұрланұлы
